評估流程

背景

5 歲男童，K3，老師反映上堂常常離座、抄寫慢，寫字時手腕用力過度，3 個鐘做唔完功課。家長一度懷疑係懶或者唔專心。

評估發現

感覺尋求 (sensory seeking) 行為高，前庭覺輸入不足；上肢近端穩定弱，影響執筆穩定性；執行功能（任務轉換）較弱。並非「唔聽話」。

介入方向

每週一節 50 分鐘上門訓練 + 家長家居策略（感統小活動、書寫姿勢調整、過渡時間 visual schedule）。

成效

三個月後：寫字速度提升約 40%，功課時間縮短一半，老師反映上堂專注力明顯改善。家長學識點樣喺日常生活幫到小朋友。

背景

5 歲半男仔，K2 國際幼稚園學生。家長最初係因為老師反映「永遠唔肯加入小組活動」、「同其他小朋友玩嘅方式好唔同」、「換 activity 嘅時候會喊」而求助。屋企方面，剪頭髮係惡夢、新食物從不嘗試、唔肯著新衫。家長正等候衛生署評估，但 waitlist 約 14 個月。

評估發現

觸覺過度敏感 (tactile defensiveness)：抗拒新質感、人多近距離接觸。聽覺過度敏感：嘈雜環境（mall、生日會）會引致神經系統超載。轉換困難 (transition difficulties)：神經系統需要更長時間 down-regulate。社交互動 profile 符合 ASD 譜系特徵，建議轉介心理學家確診評估。認知能力同齡或以上。

介入方向

每週 1 節個別上門訓練（50 分鐘）：以小朋友最鍾意嘅恐龍主題作為切入點，融入感統活動。Therapeutic Listening 計劃：每日喺屋企進行 20 分鐘。家長培訓：教家長識別 dysregulation 早期訊號、學識 co-regulation 技巧、設計屋企 sensory-safe corner。與家長同學校建立「轉換預備」routine：visual schedule、5-minute warning。

成效

6 個月後：小朋友開始主動加入小組活動（最初係觀察 5 分鐘，慢慢延長到完整參與）；剪頭髮由 30 分鐘崩潰變成 10 分鐘平靜完成；學會用 visual schedule 自己預備過渡。家長學識識別「黃燈」訊號，meltdown 頻率減少約 70%。心理學家確診 ASD Level 1，家長因為已有完整介入計劃，接受確診時情緒較為平穩——「我哋唔係由零開始，係已經行緊呢條路。」

背景

7 歲小一女仔，本地津貼學校。學期初開始老師反映「中文默書永遠零分」、「抄寫永遠抄唔完」、「成日寫鏡像字」。家長一度以為係 lazy、唔用心，補習 3 個月無改善。女仔開始抗拒返學、扭計頭痛、半夜驚醒講「我好蠢」。家長相當焦急但唔知從何入手。

評估發現

智力同口語表達同齡或以上（家長帶過去做 IQ 評估，FSIQ 116）。視覺處理 (visual processing)：視覺辨識、視覺記憶明顯弱。視覺追蹤 (visual tracking)：閱讀時眼球移動唔順暢，跳字、漏行頻繁。執筆姿勢：手腕用力過度，手部小肌肉耐力低。字型結構記憶：對中文字嘅部首—結構關係建立緩慢。強烈建議轉介教育心理學家進行正式讀寫障礙評估。

介入方向

第一步係同家長解釋：「呢個唔係懶嘅問題，係佢嘅大腦處理文字嘅方式同一般唔同」——光呢句說話已經令家長同小朋友釋懷。轉介教育心理學家（與家長同行揀選合適嘅 EP）。同步開始 OT 介入：視覺處理訓練、書寫困難訓練（執筆、姿勢、字型結構策略）、家居默書策略（multi-sensory learning：用手指空書、用身體做動作）、執行功能（拆解默書溫習成小步驟）。與學校 SENCo 溝通，申請課堂內合理調適。

成效

6 個月後：教育心理學家確診中文讀寫障礙 (Specific Learning Disability)。小朋友獲得學校 IEP 支援同考試合理調適（額外時間、放大字體）。默書由 0 分慢慢去到 40–50 分（家長最初目標只係 30 分）。最重要係小朋友嘅自我認知由「我好蠢」變成「我嘅腦袋係用另一個方式學嘢」。半夜驚醒、扭計頭痛完全消失。

背景

zh 2 歲半女幼兒。父母均為高強度工作專業人士。由 2 歲起家中照顧者已更換 4 次（兩位家傭因合約問題離港、一位外婆因健康原因暫停）。家長近月發現幼兒：日日喊住唔放媽媽返工、夜晚扭計極長、開始重複出現拍打自己頭嘅自我刺激行為、食慾下降。健康院健康評估發展指標仍在正常範圍，但行為令家長極度擔憂。

評估發現

發展指標（大小肌肉、語言、認知）大致同齡。神經系統 profile：長期處於 sympathetic activation（戰逃反應）——心跳快、呼吸淺、難以入睡。依附關係 profile：典型焦慮型依附 (anxious attachment) 特徵——對主要照顧者 hypervigilant。自我刺激行為（拍頭）係佢自己嘗試 self-regulate 嘅方式。重要：呢個唔係單純 OT 議題——根本問題係依附關係創傷，需要多專業介入。

介入方向

我同家長坦誠講：「我會盡 OT 角色幫到嘅部分，我建議我哋同時引入註冊兒童臨床心理學家進行依附導向嘅 parent-child therapy。」家長同意後，與臨床心理學家協作分工。OT 角色：Polyvagal-informed co-regulation 培訓（教父母用身體節奏 rocking、deep pressure、soft humming 幫女兒 down-regulate）；家居感覺環境設計（建立 predictable sensory rhythm：固定嘅睡前 routine、固定嘅唱歌、固定嘅 transitional object）；「同一位治療師」嘅力量（我承諾佢成個 OT 旅程都由我跟，唔會換人——對佢嘅神經系統嚟講，多一個 stable adult 已經係治療嘅一部分）；強烈建議家長盡量穩定家庭照顧者（最少 6–12 個月不更換）。同樣重要嘅，係父母嘅心理支援。

成效

4 個月後：家長落實穩定家傭安排（簽 2 年合約並提供額外支援）。每晚睡前 routine 由 90 分鐘扭計變 20 分鐘平靜入睡。拍頭嘅自我刺激行為大幅減少（由每日 10+ 次變成每週 1–2 次，多數喺極度疲倦時出現）。媽媽返工時嘅分離由「世界末日級喊」變成「不捨但可以揮手」。臨床心理學家繼續跟進依附議題，OT 介入頻率減低為每月 review。 cn

背景

10 歲小四男仔。3 歲時確診 ASD Level 1（前稱 Asperger's），6 歲時加上 ADHD-Combined Type 確診。智力 FSIQ 130+，學術表現極優異但社交、情緒、執行功能困難隨年齡加劇。學校已轉換兩間（前兩間因情緒爆發事件被勸退）。媽媽嚟我度時講：「我已經試過幾個治療師，每個都做三個月就無進展。佢哋話我個仔『太聰明、太挑戰』。」

評估發現

* 認知強項：語言、抽象推理、視覺空間 * 困難領域： * 執行功能：任務啟動、時間感、過渡轉換、自我監察明顯弱 * 情緒調節：「0 到 100」式爆發，多數由感覺超載 + 認知 rigid thinking 共同觸發 * 社交：理解別人觀點困難，但極渴望被理解 * 感覺：聽覺、觸覺過度敏感，前庭覺尋求 * 關鍵發現：之前嘅治療師多數用「行為矯正」approach，小朋友抗拒；佢需要嘅係被視為合作伙伴嘅介入方式 * 已有 self-image 損害：「我成日諗，係咪我有問題」

介入方向

第一步——同小朋友直接傾。10 歲嘅佢需要被當成合作伙伴，唔係治療對象。我哋一齊定義目標：佢自己揀「我想學識點樣喺崩潰之前停低」、「我想識點樣同朋友傾偈但唔煩到佢哋」。 Polyvagal Theory 心理教育：教佢識別自己嘅神經狀態（用 traffic light 比喻），由「我又失控」轉化為「我嘅神經系統而家紅燈，我要點 down-regulate」。 執行功能 coaching：用佢最鍾意嘅 Minecraft 作為類比，將每日任務當成「building blocks」。 感覺策略：noise-cancelling headphones 嘅合理使用、課室位置調整建議。 與學校 SENCo 同 EP 緊密合作。 與媽媽嘅 parent coaching：點樣由「日日災難管理」轉化為「日日協作」。

成效

8 個月後：情緒爆發頻率由每週 3–4 次減至每月 1–2 次。學校反映佢開始識主動申請「需要 sensory break」而唔係直接崩潰。家庭關係明顯改善——媽媽形容「我終於覺得我同個仔係同一隊」。學術表現繼續優異，但更重要係佢開始對自己嘅大腦有 ownership：「我嘅腦袋係 unique 嘅，我學緊點樣同佢合作」。